لیکنه: مولوي نورالحق مظهري/ تعلیم الاسلام ویب پاڼه
د دښمن په وړاندي غفلت
دا معلومه خبره ده چي هر دښمن د انسان د نيمګړتياوو څخه خپل په ګټه استفاده کوي او په دوه حالته کي په انسان کي نيمګړتياوي پيدا کيږي: په هغه حالت کي چي انسان د فرصتونو څخه سمه ګټه پورته نکړي او په هغه حالت کي چي انسان د ځان په وړاندي ننګوني او چالشونه و نه پېژني.
هر فرصت انسان ته يو ځل په لاس ورځي، نو که څوک د په لاس ورغلي فرصت څخه ګټه پورته نکړي معلومه خبره ده چي هغه به يې له لاسه وځي او بالمقابل دښمن ته به يې فرصت په لاس ورځي چي دا دده لپاره نيمګړتيا سوه او د دښمن لپاره يې نغده ګټه سوه، همداسي د کارونو په وړاندي که څوک ننګوني نه پېژني او له منځه يې نه وړي معلومه خبره ده چي دده په وړاندي به ډېر خنډونه مخي ته راځي او ډېر کارونه به يې د ځنډ او درېدلو سره مخامخ کيږي او بالمقابل دښمن به يې نور هم قوي کيږي او د وخت څخه په استفاده دده مخي ته به نور خنډونه هم جوړوي.
په اصل کي د فرصتونو او ننګونو په وړاندي بې تفاوته پاته کېدل د دښمن په مقابل کي غفلت دی چي د ځان لپاره بدبختي او د دښمن لپاره برياليتوب د ځانه سره لري؛ نو که غواړی په داسي غفلت باندي اخته نسی په ژوند کي فرصتونه او ننګوني و پېژنئ، د فرصتونو څخه ګټه پورته کړئ او د ننګونو په وړاندي مبارزه وکړئ تر څو خپل هدف ته پر وخت په آسانۍ سره ورسېږی.
www.taleemulislam.net
