د (نيکمرغه مېرمن) نورې ليکنې
تازه سرليکونه
بېلابېلې ليکنې
د تمدنونو د ړنګېدو یوه وسیله
د تمدنونو د ړنګېدو استعمالېدونکې وسیله
لیکنه: عبدالغفار جبیر،
د کتنپلاوي لخوا د نوي زیاتونو سره
ایا تاسو فکر کړی دی چي ولي نن غربي نړۍ په اسلامي ملکو کي د ښځو د را ایستلو لپاره په ملیارډو ډالره پانګونه کوي؟ ددې تر شا لاندي ستر رازونه وګوری.
راسی وګورو چي پخواني لوی او قوي تهذیبونه څنګه ړنګ سول.
د یونان د تمدن ړنګېدل
تاریخ دا ثابته کړېده چي د یوناني تهذیب د زوال سبب د ښځو بې پرده ګي ، عریاني ، د نارینه وه سره د بې باکۍ ، راشه درشه، ښکلا او زینت او د بدن د ښکلا ښکاره کول وو، رومیانو ښځه په پرده کي ساتلې وه، چي د ښځي وقار، عفت او عزت ئې هم ورسره ساته، او کله چي د روم فتوحات پر مخ ولاړل نو ښځي یو دم د کورونو څخه راووتې، د حجاب جنازې پورته سوې، ښځې بې ستره بربنډي په هر ځای کي تر سترګو کېدې، او په عامو مجلسو، محفلو او هر ځای د نارینه سره یو ځای، او د نارینه وو د خوښۍ ، شوق او طبعیت راستګۍ یوه اله سول، او دا د فحاشۍ بازار ګرم سو، چي ډېر ژر ئې د نارنیه و اخلاق فاسد او ختم کړل، د هغوی د جنګ جذبې، ولولې او د بهادرۍ څپې یې ورمړې او کراري کړې، چی د نارینه څخه ئې ټول طاقت او احساسات ، او فوځي غرور، د خپلې خاورې ساتنه سلب او واخیستل، او د فوځ ټول جنګي مهارتونه په عیاشۍ بدل سول، او هغه قوت ، دبدبه او حیثیت ئې د خاورو سره خاوري سو، فوځي تربیه، په تنبور، رباب، شرابو، زنا، رقص او جادو بدل سول، چي دا هغه شیان دي چي شجاعت، ازادې، خپلواکې ، زور او دبدبه له مینځه وړي.
د روم د امپراطورۍ په اخر کي ټول د جنګ خلک د دولت لوړپوړي چارواکي د ښځو په لاسو کي ولوېدل، او هر څه چي ښځو غوښتل هغه کېدل، د ټولي امپراطورۍ واک د بې حیاء ښځو په واک کي و، او هرڅه د دوی په اختیارکېده، او همدا لویه امپراطوري ټوټې ټوټې سوه.
لوئس پېرول په (Review of Reviews) په ۱۱ ټوک، د(Political Corruption) د سیاسي فساد تر عنوان لاندي لیکي:
د لوړو اخلاقو دا مضبوط دیوال یواځي ښځه نړولای سي.
په تاریخ کي د ښځو د بې پردې له کبله ډېر داسي اوښتنونه (انقلابونه ) راغلي دي، چي په زرهاوو پاڼې په ډکي دي، خو زه نور د موضوع څخه وځم او یواځي په دې اکتفاء کوم.
د اندلس د ستر تمدن ړنګېدل
اندلس یا اوسنۍ هسپانیا چي د اسلام د ورتګ د مخه د ظلم، جهل او تیارو مرکز وو، د جهاد او فتح په واسطه د مسلمانانو خپل سو، ۸۰۰ کاله د مسلمانان ملک وو، د علم او اسلامي تمدن یو بهترین تهذیب وو، د مځکي د جنت لقب ورکول سوی وو. تاسو خپله فکر وکړی پر یوه ملک چي مسلمانان ۸۰۰ کاله اباده وي هغه به د اسلاميت، علم او پرمختګ له مخي څومره مخته تللی وي؟! خو د مسلمانانو همدغه هیواد ولي د دوی د لاسه ووتی؟
د اندلس په مسلمانانو کي اسراف، فسق او بد اخلاقي رایج سوه، د اندلس مسلمانانو ډماني او فاسدي ښځي وپېژندلې. د واکمنو کسانو بدنونه درانه سوه (چاغ سول)، په نعمتونو کي ډوب سول او د هیواد ساتني او جهاد توان یې د لاسه ورکړی. واکمنو کسانو د مینځو او پیغلو په لاس ته راوړلو کي مسابقې شروع کړې، د ښځو سره يې علاقه زیاته سوه، د ماڼیو په جوړولو مصروف سول. کله چي حاکمانو او والیانو د عیسايي ښځو سره ودونه وکړل نو د فساد دروازه لا خلاصه سوه، په دې سره یې خپل منځي اختلافات ډیر سول.
د مسلمانانو واحد صف تیت او پرک سو چي بالاخره عیسایانو د همدغه ګډوډۍ په نیتجه کي حملې وکړې، د مسلمانانو اندلس يې ونیوی او تر اوسه یې په لاس کي دی. هلته د اسلام څرک اوس نه ښکاري حال دا چي ۸۰۰ کاله د مسلمانانو هیواد وو.
نړیوال سیاستونه ښځي همیشه د حربې او د جنګ د یوې خطرناکه وسیلې په ډول استعمالوي!
د صلبي جنګو دور
د صلبي جنګو په وخت کي صلبیانو ستر غازي صلاح الدین ایوبي رحمه الله ته ښځي په تحفه کی ولېږلې تر څو دی متاثره کړي! تاسو خپله فکر وکړی چي د جنګ د ټولو اسبابو پر ځای یې دغه نرم مخلوق ور ولېږی! نو دوی ښځه د یوه وسیلې په توګه استعمالوي!
د امت تر ټولو ضررناکه امتحان
ځکه نو رسول الله صلی الله علیه وسلم د امت لپاره تر ټولو ضررناکه فتنه ښځه بللې ده، فرمايي:
مَا تَرَكْتُ بَعْدِي فِتْنَةً أَضَرَّ عَلَى الرِّجَالِ مِنَ النِّسَاءِ. متفق علیه
ژباړه: زما وروسته ما کومه داسي فتنه (امتحان) نه ده پرې ایښې چي د نارینه لپاره د ښځو تر فتنې زیاته ضررناکه وي.
(او د ښځو د فتنې څخه نجات د ښځو او نارینه وو ترمنځ په پوره ستر او حجاب سره راځي....)
------------------------------
د اسلامي نړۍ پېژندنه، په وړاندي یې د کفري نړۍ دسیسې په لاندي ګټور کتاب کي لوستلای سی:
ورته ليکنې:
تبصره
