تازه سرليکونه
د (چاڼ سوي مضامين) نورې ليکنې
تازه سرليکونه
بېلابېلې ليکنې
محصل ته نصیحت: صبر او استقامت (۴)
  تعلیم الاسلام راډیو
  July 18, 2017
  0

 لیکنه: استاذ عبدالسمیع شنواری / تعلیم الاسلام ویب پاڼه

 
څلورم نصیحت:
 
صبر، کوښښ، تکلیف ګالل، او د نا امیدۍ څخه ځان ساتل
 
أ - ګرانو محصلینو! 
 
په دې کي شک نسته چي تعلیم او زده کړي یو مشکل او سخت کار دی لیکن په دې کي هم شک نسته که څوک صبر او د لوړ همت خاوند وي، نو هر سخت او مشکل کار الله جل جلاله ورته اسانه کوي، او الله مه کړه که څوک د صبر او همت د لوی نعمت څخه محرومه وي نو هغه هیڅکله هم د علم لوړي مرتبې ته نسي رسیدلای، او کوم عالمان چي د تاریخ په اوږدو کي تیر سوي دي د علم او پوهي لوړ منزلت ته رسیدلي او نن ورځ د هغو د علمي څیړنو او کتابونو... څخه په دنیا کي په لکونو انسانان استفاده کوي، او نومونه یې په ډیر ادب او حترام سره یادوي، د هغو سیرت که وکتل سي هغه د علم او پوهي لوړي مرتبې ته په اسانه ندي رسیدلي، بلکي ډیر زحمت یې استلی او پر هغه باندي یې دوامداره صبرکړی و.
 
 الله جل جلاله د صبر په باره کي داسي فرمائي:
(يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ) (سورت البقره ۱۵۳).
 ترجمه: ای مومنانو په صبر او لمانځه سره مرسته وغواړئ الله د صبر لرونکو ملګری دی.
 
ب - ګرانو محصلینو! 
 
یو لوی او بد مرض چي انسان ته همیشه متوجه وي په خاصه توګه د تعلیم او تحصیل په دوره کي چي دا بد مرض بل شی ندی هغه نا امیدي او مایوسي ده، چي سړی د خپل راتلونکي څخه مایوسه سي د کوښښ، او زیار لاره پریږدي، او شیطان لعین همیشه په هم دې کوښښ کي وي چي مسلمان په هم دې مرض اخته کړي، خو د مسلمان محصل او زده کونکی حوصله باید ډیره لوړه، او د لوړ همت خاوند وي، او د ټاکلی هدف لپاره په  لوی صبر او همت سره باید روان وي، او شیطانی وسوسو ته باید په خپل زړه او فکر کي  ځای ورنکړي، او د الله جل جلاله په قضاء او قدر باندي راضي واوسي، او د الله جل جلاله د رحمته مایوسه او ناامیده نه سي، تاسو د حضرت یعقوب علیه السلام حالت وګوری کله چي یې زوی یوسف علیه السلام په لسګونه کلونه ور څخه ورک و بیا هم د الله جل جلاله د رحمته ندی نا امیده سوی، او خپلو اولادو ته هم په صبر سره توصیه کوي لکه الله جل جلاله چي فرمائي:
 
 ( يَا بَنِيَّ اذْهَبُوا فَتَحَسَّسُوا مِنْ يُوسُفَ وَأَخِيهِ وَلَا تَيْئَسُوا مِنْ رَوْحِ اللَّهِ إِنَّهُ لَا يَيْئَسُ مِنْ رَوْحِ اللَّهِ إِلَّا الْقَوْمُ الْكَافِرُونَ ) ( سورت الیوسف ۸۷ ).
 ترجمه: زما زامنو ولاړشی د یوسف علیه السلام او د هغه د ورور پته ولټوی د الله له رحمت څخه ناهیلي مه اوسی د هغه له رحمت څخه کافران ناهیلي کیږي .
 
ابراهیم علیه السلام ته چي په سپین ږروالي کي د اولاد زیری ورکول سو، نو ابراهیم علیه السلام تعجب وکړی، نو ورته وویل سوه چي ته ناهیلی کیږه مه، ابراهیم علیه السلام ورته وویل د الله جل جلاله څخه خو ګمرهان ناامیده کیږي، په دې باره کي الله جل جلاله داسي فرمائي: 
 
(قَالَ وَمَنْ يَقْنَطُ مِنْ رَحْمَةِ رَبِّهِ إِلَّا الضَّالُّونَ) (سوره الحجر ۵۶)
 ترجمه: ابراهیم علیه السلام وویل: د خپل رب له رحمت څخه خو ګمراهان ناهیلي کیږي.
 
مخکنۍ برخي
 

سرته