تازه سرليکونه
د (احکام) نورې ليکنې
تازه سرليکونه
بېلابېلې ليکنې
د اضحیې تعریف، حکم او فضیلت
  تعلیم الاسلام ویب پاڼه
  August 5, 2019
  0

 أُضْحِيَّة

سرچینه: تعلیم الاسلام ویب پاڼه

د لوى اختر په لومړۍ ، دوهمه ، او دريمه ورځ د ثواب د پاره چي څاروى يعني پسه ، بزه ، غوا يا اوښ حلاليږي هغه ته  أُضْحِيَّة وايي .

 
د مفسرينو مشهوره وينا دا ده چي د سورة الکوثر د دې آيت : فَصَلِّ لِرَبِّكَ وَانْحَرْ ( ٢الکوثر) مراد د لوى اختر لمونځ او قرباني کول ده .
 
رسول الله  صلی الله علیه وسلم په مدينه منوره کي هر کال  اضحیه کوله او  اضحیه يې پخپل لاس حلالوله .
 
لاندي د حضرت عايشې رضي الله عنها د هغه حديث ژباړه رانقلوو چي رسول الله صلی الله علیه وسلم  د قربانۍ ثوابونه پکښي ذکر کړي دي : 
 
ژباړه : د لوى اختر په ورځ د بني آدم د ټولو کارونو څخه الله  عزوجل  ته خوښ عمل د وينو تويول دي ، دا قرباني د قيامت په ورځ د ښکرونو ، وړيو او ښنګرو سره راځي ، د قربانۍ وينه مځکي ته د رسېدلو څخه تر مخه د الله په حضور کي د قبوليت لوړ ځاى نيسي ، نو په ښه زړه قربانۍ کوئ (۱)
 
د قربانۍ حکم
د لوى اختر قرباني کول د ابوحنيفه رحمة الله علیه  په آند واجب ده او د ابويوسف رحمة الله علیه  او امام محمد رحمة الله علیه  په آند مؤکد سنت ده . 
 
 قرباني پر هر هغه حر مسلمان باندي واجب ده چي مقيم او غني وي ، شتمن او غني که په شرعي ډول مسافر وو يعني څلور رکعتيز لمونځ يې دوه رکعتونه کول پر هغه باندي قرباني کول واجب نه ده ، دغه ډول پر فقير او مسکين باندي هم قرباني واجب نه ده .

د قربانۍ وخت
د قربانۍ د حلالو وخت د لوى اختر د لومړۍ ورځي څخه بيا د دريمي ورځي تر لمر لوېدو پوري دى . 
 
د ښار د هستوګنو او هم د هغو ځايونو د هستوګنو کوم چي هلته د اختر لمونځ ادا کيږي د قربانۍ وخت د اختر د لمانځه څخه وروسته دى ، دا کسان که د اختر تر لمانځه دمخه قرباني وکړي په قرباني کي نه شمېرل کيږي ، البته د صحرا خلک کوم چي د اختر لمونځ ورباندي نسته هغوى د اختر د اولي ورځي د سپېدو څخه وروسته هم قربانى حلالولاى سي .
 
د قربانۍ د حلالو د پاره د هغه ځاى وخت معتبر دى کوم چي هلته حلاليږي ، د ښار هستوګن که خپله قربانۍ صحرا ته وليږي نو وکيل يې د اولي ورځي د سپېدو څخه وروسته هم حلالولاى سي ، ځکه هلته د اختر لمونځ نه ادا کيږي .
 
د صحرا هستوګن که خپله قرباني ښار ته وليږي وکيل يې د اختر تر لمانځه دمخه نسي حلالولاى ځکه په ښار کي د اختر لمونځ ادا کيږي .
 
که په يو وطن کي اختر يوه ورځ دمخه وي او هستوګن يې خپله قرباني داسي وطن ته وليږي ، چي هلته اختر يوه ورځ وروسته وي ، د همدې کس وکيل کولاى سي چي د اختر په دريمه ورځ يې قرباني حلاله کړي ، که څه هم دا ورځ د مُوَكِّلٌ په وطن کي د اختر څلورمه ورځ کيږي .
 
ماخذ: فقه المبتدي، دوهم ټوک
مؤلف: مولوي محمد عمر خطابي حفظه الله
----------------------------------
د اختري یا اضحیې مسایل
مرکه- د اختري د نصاب تفصیلي تحقیق
۲ د حضرت ابراهیم علیه السلام قرباني
۵ درس- د قربانۍ حیوانات
فتوا: ایا د اضحيې یا اختري کولو قضا سته؟
فتوا: د ښځو اختری لخوا او د خور اختری کول
فتوا: د ښځو پر کالو زکات او اختری
فتوا: د ذبحه سوي حیوان کوم اعضا خوړل حرام دي؟
۱ درس- د لوی اختر مسایل
 

سرته