تازه سرليکونه
د (نکاح) نورې ليکنې
تازه سرليکونه
بېلابېلې ليکنې
صِهْرِي مُحَرَّمَاتُ
 
  December 27, 2011
  0

د ښځو دوهمه ډله كومي چي هيڅ كله د هغو سره نكاح نه تړل كيږي هغه ښځي دي چي د نكاح د خپلوۍ لكبله د هغو سره هيڅ كله نكاح نه صحيح كيږي ، دغو ښځو ته صِهْرِي مُحَرَّمَاتُ وايي .

صِهْرِي مُحَرَّمَاتُ دا دي :

خواښې : د خپلي ښځي نَسَبِي مور او رضاعي مور د سړي خواښې بلل كيږي ، دغه ډول د خپلي ښځي نَسَبِي او رضاعي اناگاني هم د سړي خواښياني كيږي او هيڅ كله يې د هغوى سره نكاح نه صحيح كيږي .
د ښځي سره چي يو ځل نكاح وتړل سي ، كه را واده سي او كه را واده نسي د دغي ښځي مور او اناگاني د سړي مُحَرَّمَاتُ گرځي هيڅ كله يې هم نكاح نه ورسره صحيح كيږي .

بچندره : بچندره د خپلي ښځي هغي لور ته وايي چي د بل مېړه څخه يې وي ، بچندري ته په عربي رَبِيبه وايي.
همدا ډول د خپلي ښځي هغه لمسۍ چي د بل مېړه د اولاد څخه يې وي هم د بچندري حكم لري .

د هغي ښځي لور د سړي بچندره گرځي ، هيڅ كله يې نكاح نه ورسره صحيح كيږي چي هغه را راوده سوې وي او څښتن يې نژديكت ورسره کړى وي .
كه څوك د داسي ښځي سره نكاح وتړي چي هغه لور ولري خو د را واده كولو دمخه يې طلاقه كړي د دې ښځي د طلاق عده چي تېره سي نو بيا دا سړى د هغې د لور سره نكاح تړلاى سي .
ځكه بچندره هغه مهال مَحرَمه ګرځي چي سړى يې د مور سره نكاح وتړي او را واده يې كړي .

ميره : ميره د پلار وهغي ښځي ته وايي چي د سړي خپله مور نه وي بلکى د مور بن يې وي .
د سړي پلار يا نيكه چي د ښځي سره نكاح وتړي فقط د نكاح په تړلو دا ښځه د سړي ميره ګرځي .
ميره كه څه هم راواده سوې نه وي بيا هم د تل د پاره پر سړي حراميږي .

مږور :  د خپل زوى ښځه د سړي مږور بلل كېږي او هيڅ كله يې نكاح نه ورسره صحيح كيږي .
همدا ډول د لمسيانو او كړوسيانو ښځي هم د سړي مږندي بلل كيږي هيڅ كله د هغو سره د سړي نكاح نه صحيح كيږي .
پورتنى ښځي يعني خواښې ، بچندره ، ميره ، مږور د سړي د نكاح د خپلوۍ لكبله مُحَرَّمَاتُ دي هيڅ كله د سړي نكاح نه ورسره تړل كيږي .

د دغو ښځو سره ليدنه كتنه ، ناسته ولاړه جائز ده او همدا ډول ښځه د همدغو خپلوانو يعني خپل زوم ، پلندر ، بنزي او خسر سره سفر كولاى سي البته چي امين هم وي .
 ځکه كه امين نه وي او خطره ورڅخه ليدل كېدله بيا به ښځه د هغه د فسق او بې باورۍ لکبله سفر نه ورسره كوي .

ماخذ: فقه المبتدي، دريم ټوک-نکاح

سرته