تازه سرليکونه
د (علوم القران) نورې ليکنې
تازه سرليکونه
بېلابېلې ليکنې
د قرآن کريم نوم او تعریف
  تعلیم الاسلام ویب پاڼه
  April 8, 2018
  0

ژباړه: مولوي محمد اکبر / تعلیم الاسلام ویب پاڼه


د قرآن کريم اصلي نوم قرآن دئ، خپله قرآن د خپل ځان له پاره دوه اويا (۷۲) واري دا نوم استعمال کړی دئ.
د عربي ژبي د قاعدو له مخي د دې لفظ مأخذ څه دئ؟، په دې اړه درې قولونه را نقل سوي دي:


لومړی قول دادئ چي:- قرآن د ( ق،ر،ء) د مادې څخه جوړ سوی دئ چي معنی يې لوستل دي، يعني يو داسي کتاب چي ډېر او څو څو واري لوستل کېږي، د ډېرو علماؤ همدا رأيه ده او خپله د قرآن کريم د دې ارشاد:


 (إِنَّ عَلَيْنَا جَمْعَهُ وَقُرْآنَهُ  * فَإِذَا قَرَأْنَاهُ فَاتَّبِعْ قُرْآنَهُ) (۱) 
څخه د همدې نظر او رأيي تاييد کېږي.


دوهم قول دا دئ چي:- د قرآن اصل د (ق،ر،ن) د مادې څخه جوړ سوی دئ او د دې معنی يو د بل سره مشابه کېدل، ځکه د قرآن کريم مضامين يو د بل سره مشابه، سره تړلي او د اختلاف او ټکر څخه خالي دي، دا رايه و علامه ابوالحسن اشعري رحمه الله  ته منسوبه ده.


دريم قول د امام شافعي رحمه الله دئ :- چي د قرآن لفظ د کوم بل لفظ څخه نه دئ جوړ سوی، دا پر نبي (صلی الله علیه وسلم) د نازل سوي کتاب علم دئ، لکه تورات چي پر حضرت موسی (علیه السلام) د نازل سوي کتاب نوم دئ، انجيل پر حضرت عيسی (علیه السلام) د نازل سوي کتاب نوم دئ، د دې پرته چي د قرآن کريم کوم نومان ذکر سوي دي هغه په اصل کي د قرآن کریم صفات دي، ځينو علماؤ کتاب او فرقان  هم د قرآن په نومانو کي شمېرلي دي مګر په قرآن کريم کي تورات ته هم کتاب او فرقان ويل سوي دي: 


(وَإِذْ آتَيْنَا مُوسَى الْكِتَابَ وَالْفُرْقَانَ لَعَلَّكُمْ تَهْتَدُونَ) (۲)
 نو حقيقت دا دئ چي د قرآن نوم قرآن دئ او کوم چي په نورو الفاظو سره تعبير سوی دئ هغه د قرآن صفات دي، نه نومان.


تعريف:  په اصطلاح کي د قرآن کريم تعريف داسي سوی دئ: 


قرآن کريم د الله (جل جلاله) هغه کلام دئ چي الفاظ يې پر نبي (علیه السلام) باندي نازل سوي دي، الفاظ يې په تواتر سره را نقل سوي دي، د فاتحې څخه شروع پر والناس باندي ختميږي.


د «کوم چي الفاظ نازل سوي وي» په ويلو سره حديث و وتل، هغه که قدسي حديث هم وي کوم چي رسول الله صلی الله علیه وسلم د الله (جل جلاله) له لوري خپل ارشاد نقل کړي ځکه په قدسي حديث کي الفاظ د الله (جل جلاله) د رسول وي نه د الله (جل جلاله). 


د «پر حضرت محمد (صلی الله علیه وسلم) باندي نازل سوی دئ» په ويلو سره پخواني اسماني کتابونه ووتل ځکه هغه پر نورو پيغمبرانو را نازل سوي دي.


د «په تواتر سره را نقل سوی دئ» په ويلو سره مطلب دا دئ چي دومره ډېرو خلګو را نقل کړی دئ چي په ښکاره د هغوی پر درواغو راجمع کېدل نا شونی وي ، په دې سره د قرآن کريم نور هم تعارف کېږي.


ماخذ: آسانه اصول تفسیر
_______________________________
(۱) سورة القيامة آيت: ( ۱۷- ۱۸)
(۲) سورة البقرة آيت: (۵۳) او سورة الانبياء آيت:  (۴۸)

 

تبصره
يو نوم خامخا وليکئ.دغه نوم تر ٤٠ تورو زيات دى.
برېښناليک خامخا وليکئ.دغه برېښناليک تر ٤٠ تورو زيات دى.دغه برېښناليک باوري نه دى!.
متن خامخا وليکئ.متن تر وروستي بريده رسېدلى دئ.

  که نه لوستل کېږي دلته کليک وکړئ.  

سرته